Nou chita la a, vant vid, ap pase tan
Tan n ap gaspiye nan kalbende
Kalbende, ranse, griyen dan ak lamizè
Mizè, ak ti bebe sou bra n, n ap karese
Karese ti lezanj pou fè yo dòmi san manje?
Manje Ayiti pa garanti jodi, alevwa demen.
Demen, nou tout ka lonje tout long nan kav!
Kav, se pou mò byenere, se pa pou tout kalte kadav
Kadav malerèz ak malere, se manje kochon
Kochon san manman, bandi Matisan.
Matisan? kilè vanpi sa yo ap sispann bwè san?
San kretyen vivan, ti inosan yo fin kreve je
Je pèp, je pete ki sou jenou k ap jene
Jene, priye chak jou, mande lesyèl mirak
Mirak, jis pou jwenn moso manje?
Ki sa n ap fè pou pitit nou ka manje?
Ki sa n ap fè pou Ayiti ki an danje?
Ki sa n ap fè pou bagay yo chanje?
Nou chita chita nou
N ap tann bandi gen pitye pou nou?
N ap tann yon bon politisyen vin sove nou?
N ap tann yon blan lonje men ba nou?
N ap tann leta pou vin pwoteje nou?
Anmwey
Anmwey lapolis!
Anmwey
Kote leta?
Leta ? Ki leta !!
Yon ekstrè nan tèks
Chita tann
Vilme Caze ak Timozo
Pwezi Komedi