Ayiti eleksyon: Wyclef Jean pase alatak!
Rapè entènasyonal ayisyen an Wyclef Jean ki te poze kandidati pou pòs prezidan, KEP Gaillot Dorsainvil ap dirije a te bay kanè jounen vandredi 20 dawout pase a pou koz rezidans atis la pat gen ann Ayiti pandan 5 dènye ane sa yo soti pou pete koken. Atis la kit e dakò nan yon premye tan vire. Se kòm si jan l abitye di van an vire. Li voye jete desizyon ki te pran an, li di ki pa kanpe sou anyen.
    Wyclef Jean lonje dwèt sou prezidan repiblik lan René Préval li akize kòm moun ki ta dèyè mannèv pou retire l nan kous elektoral la. Nan yon mizik anpil radyo pa sispann pase nan kapital la ansyen chantè gwoup «Fugees» la chante kote li pale de dènyè rankont li te fè ak chèf Leta a ki te envite l lakay li. Wyclef pale nan mizik la tou de dyalòg li te fè nan telefòn ak kandida Inite a Jude Célestin. Atis la presize li pa t janm siyen okenn akò ak chèf Leta a nan moman li te rankontre l la. «Préval di mwen se yon bon kandida» di Wyclef Jean nan mizik li a, li deklare ke l ret kwè ke se : «Preval menm ki rejte kandidati l la».
    Nan menm chante a Wyclef Jean pa t mete dlo nan bouch li pou kritike konseye elektoral yo ki te mete l deyò nan kous la sou zòd René Préval, selon li menm ki fè konnen ke : «Moun sa yo merite prizon, poutèt yo vyole manman lwa peyi a».
    Prezidan Fondasyon Yele Ayiti a te mete aksan sou rezon ki te pouse l poze kandidati l : se paske li te charye revandikasyon tout yon popilasyon ki nan soufrans, jenès la an patikilye. «Mete m sou kote, se mete jenès la deyò» deklare Wyclef Jean, ki fè konnen l ap kontinye konteste desizyon KEP a. E li pwomèt ke l ap kenbe angajman li te pran avèk jenès la pou kontinye mouvman Fas a fas la. Sanble angajman ak jenès la se sèlman lè yon moun prezidan ou ka kenbe l !

Solidarite Senegal ak Ayiti
Yon delegasyon gouvènman Senegal te fè yon kout pye ann Ayiti nan jounen madi 24 dawout la nan lide pou te fè chwa etidyan ki te kandida pou jwenn bous etid nan Inivèsite Osenegal.
    Nan yon kominike pou laprès ministè Afè etranje te mete deyò, enfòme tout moun ke gen yon delegasyon senegalè ki nan peyi a. Selon kominike a delegasyon sila ap gen pou l fè chwa etidyan ki te kandida pou al etidye nan inivèsite Osenegal nan mwa oktòb k ap vini la a.
    Kominike a enfòme tout moun ki enterese pou pase depoze dosye yo nan lokal komisyon miks Senegalo/ayisyen ki chita kò l nan sant Fòmasyon teknik ak pwofesyonèl (Haïti-Tech) nan Sonapi. Kandida yo dwe mache ak dosye anba bra yo tankou : yon curriculum vitae byen detaye, fotokopi konfòm diplòm bakaloreya, yon fotokopi konfòm relve tout nòt bakaloreya, fotokopi konfòm relve nòt klas Reto ak Filo, yon fotokopi kanè ak yon batistè.
    Kominike a raple ke se aprè tranbleman tè 12 janvye a ki te ravaje peyi a, prezidan Abdoulaye Wade te deside fè solidarite ak pèp ayisyen an. Yon solidarite ki poko janm ateri.

Ayiti sante : Objektif milenè pou devlopman (OMD) an pase a kote nan zafè lasante ann Ayiti
Yon reprezantan Fon nasyonzini pou zafè popilasyon (UNFPA), Igor Bosc fè konnen kantite fanm ki mouri nan fè pitit gen tandans ogmante pi plis chak jou bondye mete. Igor fè deklarasyon sa a nan kad yon atelye 2 jou ki te kòmanse jounen mèkredi 25 dawou pase a nan otèl Leplaza. Responsab LONI an fè remake yon lòt bò ke ; sou chak 100 mil akouchman ki fèt plis pase 630 manman fè vwèl pou peyi san chapo. Daprè yon sous Nasyonzini, yo fè konnen 630 mò pou chak 100 mil akouchman an se to ki pi wo nan tout zòn Karayib la.
    Bosc anonse ke yo sou wout mete sou pye 5 strateji ki pou pèmèt yo fè fas ak sitiyasyon an nan lide pou frennen fenomèn fanm k ap mouri nan fè pitit nan peyi a, epi ranfòse planin familyal. Igor di li rekonèt ke objektif milenè pou devlopman òganizasyon li reprezante a – FNUAP - deklare y ap mete anpil aksan sou kesyon planin familyal. Tout sa se bobin. Igor, menm si l konprann pwoblèm nan pa pral leve plim sou do èg la. Puiske l ap travay pou li.

Eleksyon Etazini : Kandida ayisyen yo ap fè bèk atè nan eta Florid
Se ak dlo nan je, lawont ak desepsyon ayisyano ameriken k ap viv nan eta Floride te aprann defèt kandida ayisyen ki te patisipe nan eleksyon primè pati demokrat ki te dewoule nan 17 èm distri eta Florid selon sa Alterprès nan Florid rapòte. Kominote ayisyen an pat soti al vote an mas, moun te kapab konstate ke ayisyen ki te patisipe nan primè 24 dawou pase a, malgre yo se kominote majoritè nan distri a. Pati demokrat la te òganize eleksyon primè nan plizyè rakwen Etazini nan lide pou chwazi moun ki pou al reprezante pati a nan eleksyon demi manda prezidan Barack Obama k ap gen pou fèt nan mwa novanm k ap vini la.
    Eleksyon primè sa yo te sou wout louvri pòt pou kandida ayisyano meriken yo nan lide pou yo te voye youn pami yo al reprezante pati a pou pòs depite nan chanm reprezantan an nan Washington. Men angrè divizyon te gentan simen nan mitan kandida ayisyen ki nan 17 èm distri a, yo pat pran lontan pou te pèdi lafas nan yon chire pit ki te ouvè lavwa a yon kandida afwo ameriken, Frederica Wilson ki ranpòte eleksyon primè a ak 35 % vòt ki te fèt yo. Viktwa sa a mete madan Wilson sou wout pou ranplase Kendrick Meek nan eleksyon k ap gen pou fèt nan mwa novanm 2010 la.
    Kandida malere ayisyano meriken Rudolph Rudy Moise rive an dezyèm pozisyon dèyè Frederica ak 16% vòt. 3 lòt kandida ayisyen tankou Yolly Robenson te fè 10% Phillipe Jean Brutus 9% Marleine Bastien 6% vwa pami moun ki vote pou yo.

Asosiyasyon elèv ak paran rele anmwe nan Sen Mak
Asosiyasyon paran ak elèv viktim 12 janvye nan vil Sen Mak te leve vwa yo byen wo jounen lendi 30 dawout la pou poze otorite yo kesyon pou konnen « èske se pitit bèl mè yo ye». Nan yon nòt pou laprès asosiyasyon an te mete deyò kote deklare ke y ap kontinye denonse direktè ministè Enteryè a Sénatus Jude ak Joseph André Lafontant ki se responsab USAID nan zòn nan ak majistra Bona Charles ki pa deside peye kèk lekòl ki te resewva ti moun ki te soti nan zòn ki te touche anba tranbleman tè 12 janvye a, jan otorite yo te pwomèt sa a «Jodi a se nou menm elèv ak paran k ap peye konsekans rezilta ekzamen ofisyèl ki pibliye a, kote direksyon lekòl yo pa deside bay elev yo rezilta ni atestasyon ekzamen leta a akoz kòb yo pa resewva nan men otorite yo» deklare responsab APEV yo nan nòt la. Nòt la pousib pou mande mete aksyon piblik an mouvman kont moun yo te site pi wo a. Pou yo ka bay bon jan eksplikasyon pou tout moun konnen kote lajan lekòl ti moun Sen Mak yo pase. Manm Asosiyasyon an sèmante 7 fwa 77 fwa pou di ke kou sa pap pase e yo menase nan jou k ap vini yo pou pase alaksyon.